Vegg barcon
Musicata dal Maestro Serpari
Quanto fregg! L'è già sera!
Nebbia che se sbassa!
El barcon, senza pressa
l'ultim pont l'infila.
Silenzios pian el và
sul Navili Grand.
Tra i dò spond del laghett,
ecco l'è rivaa,
L'è rivaa, ma stavòlta,
per lù, l'è 'l principi
d'on viagg che la manda
in pension, ormai
cont i catanai!
El progress de rifless,
l'ha dervii l'ingress
d'on canal senza l'onda,
per i vegg barcon.
El barcon l'è in pension,
sol in d'on canton.
Cont el coeur te saludi!
Ultim vegg barcon!
Ultim vegg barcon!
Che nebbia sù la Riva!
L'acqua che la fuma!
On gattin, sù la sponda
deperlù el giuga.
Vegg barcon, vegg barcon,
te see nò content
de campà sul velù.
Questa, l'è la sòrt.
Gialda gh'è ona foeuja,
che lì sul navili
sola la galeggia.
I barcon, ormai...
nanca de sognai!
Al ripar sòtt el pont
a gh'è lì on barbon.
Maestà di misèri,
gran padron del mond.