Cercavi la chimera
Musicata dal Maestro C. Merli
Cont in spalla i desideri
e sòtt sella i mè speranz,
per cercà la mia chimera
sont andaa de la del mar.
Forestee tra gent foresta,
col coo bass a dì de sì,
e svanida la speranza
me restaa on pugn de mosch.
La me ciappava tutta ’na smania
e se smolava dedent di rigòrd
e rivedevi in sù la strada
la pianta che fioriva,
E quand passavi in bicicletta
me fermavi incantaa a vardà
la cort con la rizzada
la gent che la passava
pròpi lì sù la strada
che la pòrta a Milan.
A la fin de la ventura
son tornaa in su i mè pass,
cont in man ona valisa
piena rasa d'illusion.
La chimera che cercavi,
gran sorpresa tra i sorpres...
l'hoo trovada su la scala
d'ona cà del mè paes.