Stell e grimett (de balera)

 Musicata dal Maestro C. Merli

E gira gira, gira la manetta,

la giò in periferia de Milan

se sent anmò 'na veggia canzonetta...

stell e grimett se ciappen per man,

per lor l'è la festa del lisc ambrosian!

L'è on simpatich grimett

a la veggia manera,

brav giugador de bòcc,

scoppa d'ass e trisett.

El concilia i sò sògn

cont el barbera

per profumà i sò ann

con l'acqua de ròsa.

Ven giò pur anca el mond...

lù vestii de draghett

el fà i quatter salt insèma

ai sò donett.

Trii passitt in avanti,

duu passitt tutt de sbiess...

Orca l'òca! El me schiscia i pee!

I copiett riden parlen

e scherzen tra lor tucc content,

poeu se ciappen per man...

ma che festa l'è el lisc ambrosian!

Chi la sbaglià a fà i cunt

l'è la sciora Adalgisa.

Tirand in ball l'età...

se rigorda de nient.

Reginetta di stell,

quand l'è in balera,

a l'è per i grimett

'na stella sgalisa.

E se lee la permett,

a ghe fann con rispett,

l'invidi con mi stasera

a fà on balett.