Serenada per l'amor
Musicata dal Maestro C. Merli
Quanti penser sui còrd d'ona ghitara
hann faa parlà l'amor in poesia.
Anima e coeur de sòtt el ciar de luna,
hann poeu giuraa tra lor, l'eterno amor.
In pas col rest del mond me pias scoltà,
sui còrd d'ona ghitara declamà
canzon e poesii in abandon,
sù l'ideal ch'el vola el và col vent.
Se deslengua in fond del coeur
el dolz savor del primm basin d'amor.
Sù l'onda d'on soris in armonia
cont el profumm legger de primavera,
el mè destin m'ha daa la fantasia
per pitturà d'argent l'azzur del mar.
L'è bell guardà tutt quell che brilla in ciel
che metten in risalt el firmament
in d'ona dimension foeur del mond.
I desideri vann de là di sògn.
Se deslazza dent de mi
tutt quell che me pò dà i me speranz.
Per on amor sincer 'sta serenada
la canti anmò perchè la me rigòrda
el di che hoo trovaa in sù la strada,
la prima giòia che m'ha daa l'amor.
Sui còrd de la ghitara
ghe foo la serenada per l'amor
ch'el và ch'el ven...
e per l'amor che resta in fond del coeur!