Sciora Maria !... On liter !
Musicata dal Maestro C. Merli
Se sbasa el sô, l'è sera.
La luna vagabonda
tra i stell la fà la ronda.
La guarda giò de part
per fagh on poo de lus
su Pòrta Ticines.
Con l'andandura stracca,
insèma ai me penser
me strusi a l'osteria
col coeur che me magòna.
La tosa di mè sògn...
stasera l'è scappada!
Sciora Maria!... On liter per piesè!
On liter de quell bon!
Invers e disperaa son mì stasera.
Cont i me sògn galant e i mè danee,
stavòlta l'è scappada d'infilera
la dònna del mè coeur... el mè belee!
Sciora Maria!... On alter per piesè!
On alter de quell bon!
De bev cont i amis per fà legria!
E intanta i dispiesè cont el fotton
je metti sui scansii de l'osteria,
là in fila e ben sconduu tra i bottiglion.
E gira e poeu rigira,
la luna piatta e tonda
finii de fà la ronda
se mett in d'on canton.
Ghe lassa el pòst in ciel
a on ragg de sô che splend.
Camini per la strada,
e intanta i penn d'amor,
nascòst a l'osteria,
ritornen de bonora
per tampinamm el coeur
anmò pussee de prima.