Canzon disinvolta
Musicata dal Maestro C. Merli
L'è larga la foeuja stretta la via.
Ti ciappa la scova con energia
messeda la stòria con attenzion...
e scolta per ben 'sta noeuva canzon.
Nòtt meravigliosa de primavera.
Nòtt che la te incanta volentera,
con la fantasia d'on sògn nostran
te pòrta al scur in d'on paes lontan.
E in del scur ona zanzara
cont el sò zinzin zinzetta,
con astuzia fastidiosa
tutt intorna la svolazza.
I moschitt per la zanzara
voeuren fagh la serenada.
Per dispett la se rigira
e la spung la carna viva.
Nòtt che fa flanella e la natura
a svèlta la gira giust in misura
tutta l'armonia del scur de nòtt.
Se derva i pòrt del ciar e tutt in bòtt...
Li in giardin gh'è la farfalla
che la sgora spensierada.
La se ferma quand l'è stracca
sù la frasca d'ona pianta.
La se alza la se sbassa,
se slonga poeu la torna
su 'na ròsa profumada
fresca fresca de rosada.
......................................
La zanzara che zinzetta
l’è l'insegna del fastidi.
La farfalla quand la vola
l'è 'l profil de l'eleganza.