Ròsa del ciel
(duetto)
Lù
Ròsa del ciel, gemma d'orient,
dòra d'argent, mai vista al mond,
denter di sògn resta con mì.
Lee
Domà con tì, voeuri cercà
la virtù del profumm delicaa
di vioeul del penser,
che disen, per chì voeur scoltà.
Non ti scordar di mè!
Lù
Ascolti la vos di vioeul che parlen
sospes sui ond lusinghier
di penser pussee bei
che me coren dedent de la ment.
Lee
Ben del me coeur, desquatti i segrett
che la scond l'anima mia, per mett,
tutta in mostra al complett,
l'ardent sentiment che proeuvi con tì.
Domà per tì!
Lù
Sogn del me coeur, perla d'incant,
ciappom per man, pòrtom lontan
sul tecc del mond, visin ai stell.
E dal ciel fà risplend
la scalmana lusenta de foeugh,
prepotenta che scalda el mè sangh
infiamaa de voeuja infinida de viv.
El mond senza tì... l'è finii, l'è finii!
Aurora, frèsca frèsca de giòia, scoeudom tì
la smania d'amor che tampina el mè coeur.
Lee
Con tì, voeuri mètt in risalt,
la manera gentil e cortesa
che fà splend i color sui fior,
sòtta el sô de primavera.
Assieme
La passion, el coeur e l'anima nòstra,
me fann sognà de volà de volà
lassù in ciel e tocca cont i man...
i pòrt del paradis!
Lassù in ciel...
e volà... e volà... e volà...