Romanz d'amor
Mi soo nò el perchè,
ma stasera,
on romanz d'amor, voeuri scriv.
L'ombra de la nòtt silenziosa
la me ciappa el coeur, tutt d'incant.
Voeuri scriv on romanz
ch'el se contenta
d'on pòst dent de mì
on pò nascòst.
L'è on impresa
senza pretesa.
Var la pèna
de comincià.
Gh'è el mè mond silenzios,
la nòtt l'è quietta,
e i mè rigòrd
tornen indree.
Là in d'on sit che l'amor
cont i sò sògn
e i sò speranz
ghe pias giugà.
Sarà on romanz sincer
ch’el comincia
doe i mè penser, indecis
sora i pagin bianch fann flanella.
Ma la vita nò. Le la cor.
Sui strad del mè doman
i mè speranz
cont i mè sògn
voeuren giugà!