Pinuccia la tassista
Musicata dal Maestro U. Torreggiani
L'è questa la canzon
che canta la Pinuccia,
la canta coi tassista
collega de mestee.
Sul tassi per Milan,
con l'acqua el vent el sô
la sguizza de pertutt.
La schiva on tramm che riva,
e dolza 'me on bombon
ghe schiscia l'oeucc ai ghisa.
La và com' on dirett,
e lor le fann passà,
perchè de la Pinuccia
hinn tucc inamoraa.
L'è questa la canzon
che canta la Pinuccia
cont ona amisa ghisa,
tra el traficch de Milan.
E cont el tassi giald
l'è ferma sul posteg.
La ciappa in man i gugg,
per inganà l'attesa
se mett a fà calzett
con arte ben precisa.
Quand riva poeu on client,
cont on soris frizzant,
ghe derva la portera
e la partiss d'incant.
L'è questa la canzon
che canta la Pinuccia,
la canta sù la strada
intant ch'el tassi el và.
Ma quand tramonta el sô
la lassa giò el tassì.
Con sù i scarpett col tacch
el vestii longh de sera,
coi ghisa e coi tramvier
la và ballà in balera
el tango el cha-cha-cha.
Ma 'l sò penser de lee
el corr in di tassista
collega de mestee.