Paes in Lombardia
Musicata dal Maestro C. Merli
Come me pias! Oh se l'è bell! Pròpi debon!
’Stoo bell canton ch'el fà capì con distinzion,
al ciar del dì, col scur de nòtt, sui strad del mond,
come l'è bell el dialett del mè paes!
Lontan del polveron che gh'è in città
e minga tròpp visin di cimm alpin,
el mè paes campion de simpatia,
l'è on fior tra i pussee bei de Lombardia.
El mè paes, inscì 'me l'è, a l'è on gioiell
de quei nostran, che fann risplend el ciel seren,
tutt per estes sui trasparenz del bell parlà
che i nòster vegg al natural m'hann insegnaa.
Quand tremorent se ved i stell in ciel
e i ronden tornen sòtt ai grond del tecc...
al lumm di lusiroeul quand a l'è sera,
on valzerin se balla volentera.
Con pòcch pretes, el mè paes l’è on paesell,
on cantonscell de brava gent che gh'hann piesè
de lavorà in libertà sul verd di praa
e dent del fumm di officin che gh'è in città.
Fòss e fossett che passen tra i campagn
ghe porten l'acqua noeuva dent del Pò
ch'el và el và e dòpo poeu se slarga
per diventà el mar de la Padania.
El mè paes campion de simpatia,
l'è on fior tra i pussee bei de Lombardia.