Oggiad de foeugh

Musicata dal Maestro V. Pinotti

Oh vita, tanta bella e spensierada,

l’è fòrsi, mi soo nò la primavera

che senti dent de mì tutta mes'ciada

cont i oggiad de foeugh, che là in stasera

quell giovinòtt simpatich e gentil

el me faseva a mì per famm el fil.

Con di oggiad de foeugh de desideri

lù el me guardava

e se stufiva nò

de rimiramm anmò.

Simpatich e gentil ma con baldanza,

leger lù ghe piaseva

col sò bell manin

toccam el ganassin.

E se 'l voreva famm ona carezza,

mi tanto me piaseva

fagh cont el penser...

On gròss basin sincer!

Quand seri là in colleg mai pù pensavi

ch'el mond a l'è tant bell e me faseva

provà di sensazion che mai credevi.

Adess per mì la vita a l'è men greva.

Azur compagn del princip di storiell,

me fà l'oggin l'amor dedree di stell.