Nòtt de poesia

Musicata dal Maestro C. Merli

Guarda guarda che nòtt! 'Me l'è ciara!

Soridenta la luna tra i stell

la scoltava dal ciel 'na ghitara,

che per lee la sonava on stornell.

Me senti dent de mì la poesia

che me profuma i sògn pussee di fior.

A l'è per mì compagn d'ona magia

che me morisna el coeur col bon umor.

Ricercavi sui strad la fortuna,

ma l'hoo minga trovada, però,

hoo savuu che l'è là sù la luna,

e ciappala coi man se pò nò.

Rigira in del mè coo la nostalgia

de tanti bei paròll sincer d'amor,

de quand la gioventù con frenesia,

la me scaldava el sangh col sò calor.

Se spalanca per mì 'na finestra,

e 'na bocca de rosa me dis:

Son la gioia che semper la resta

in sù l'onda di sògn col soris.

Insèma ai me amis, per svarias via,

stanòtt ghe cantaremm ona canzon,

ai fanalitt di stell che fann la spia

sù chi voeur fà l'amor de nascondon.