Nostalgia de cà mia

Musicata dal Maestro C. Merli

Strett in man la valisetta

son partii per fà el soldaa.

Coi stelett in grigioverde

vagabond lontan de cà.

Per 'na guerra nò sentida,

servidor de losch padron

gh'hoo la carna slegerida

sòtt el pes di brutt magon.

Casa mia,

mi de tì gh'hoo nostalgia

con passion e frenesia

mi te sari in fond del coeur.

L'altarin de la Madonna

lì tra i scal e la ringhera...

quanti vòlt che le sognavi

quand calava giò la sera.

L'è on rigòrd che dent del coeur

me tampina e mai el moeur.

Sòtta la gronda

ris'ciarida de la luna

rivedevi in del mè sògn

ona finestra illuminada

del terz pian,

e coi brasc poggiaa sul scòss

tra i rampicant,

ona tosa che rideva

tucc i vòlt che in del passà

la me vedeva.

Ma gh'è passaa tròpp temp...

el sò nòmm... ghe l'hoo pù in ment.

Quand la guerra maledetta

dopo ann de disperaa

finalment a l'è finida

pell e òss hoo portaa a cà.

Hoo vist pù la mia ringhera,

la finestra a l'era on bus

e la luna la s'ciariva

catanai e tanabus.