Mond balòss
El Guido Cazzaniga, on brav tassista,
el cerca on pòst nascòst e pòcch in vista
per scoeud de gran premura on sò bisògn,
senza trovass però tra mezz i rògn.
Ghe vegn in ment 'na strada
in doe gh'era on cess.
Ghe và de gran volada,
el gh’è pù l'hann tòlt adess.
El cerca on quei canton,
l'è quasi lì in azion...
ma riva on sorvegliant
con la carta e pèna in man.
E lù, e lù, e lù...
l'è lì che ne pò pù!
La và, la và, la và...
Sì ma lù el sa nò se fà!
Intant de pocch distant gh'è 'na cagnetta,
la pissa adree 'na pianta sù l'erbetta.
Invece lù, vigliacch d'on mond balòss...
l'è staa costrett de fala tutta adòss!
Oej Cazzaniga damm a trà
o noeuv o pur usaa
ma comprel l'orinari !