Milan

Musicata dal Maestro C. Merli

On foeuj de carta l'apis in di man,

gh'hoo l'intenzion de scriv ona canzon

coi argoment che pòden mett Milan

desora di concett di novità.

Ma ciombia oej! L'è pròpi nò de rid!

La novità nostrana di poetta,

a l'è vegnuda in ciar, domà per lor.

Allora mì i canzon je scrivi pù?

Ma poeu perchè minga tentà?

Voeur dì và ben, se la gh'ha i gamb...

la gh'ha de 'ndà!

Se pòdi scriv coss'è del come e del perchè,

Milan a l'è la barca di cojoni?

Oppur perchè a Milan a gh'è i poverett

che tiren el carett mattina e sera?

Gh'è anca i "vu comprà" che vegnen chì cercà

l'America... che pròpi la gh'è minga.

Milan l'è on pòrt de mar

che slonga la soa man

per chì ghe pias sognà ch'el mond el cambia.

On alter foeuj e on alter dì l'è 'ndaa!

Tangent di delinquent e San Vittor.

a l'è per lor ch'el coeur del gran Milan,

adess l'è diventaa on tòcch de giazz.

Milan col coeur in man ... me ven de rid!

Milan di tradizion l'è on vegg teater.

Busecca al giovedì, merluzz de venerdì

usanz d'on temp passaa ormai sparii.

Milan d'incoeu l'è già doman...

se 'l mond el và cont el progress...

a l'è on sucess!

Milan cont i danee, Milan di forestee,

di milanes arios in sul navili.

Milan di mezz calzett, tosann che fann marchett,

liggera e galantomm in visibili.

Progress in del casett

con alter bei giughett...

và ben tuscòss ma quand ghe pensi a sora

mi cori sù i bastion

per fa on'indegestion

de aria de Milan, che l'è cà mia!