Microbi d'amor
Musicata dal Maestro P. Arosio
La malatia a l'è 'na longa lama
che tutta trasparenta la livella
el temp de la durada de la vita,
de chì posteggia el còrp in sù la terra.
Dottor cont i speziee, la medesina,
e i bei speranz insèma tègnen testa
al mal fin che se pò, contra la vita,
che denter d'on còrp san, se sent sicur.
Ma i microbi d'amor tant ross e stagn
dolz e rotond, compagn d'ona sciresa
e i melodii seren de 'sta canzon,
che gh'è scritt sul pentagrama
cont i bei dònn mezz biòtt
distes in sù la spiaggia
spanteghen l'infezion
del nòbil mal d'amor.
Te 'l disi cont el coeur... oh malatia
Te preghi tant, de mì tì và pù via!
Nanca el progress con tutta la sapienza,
el pò tegnì lontan la malatia
coi microbi d'amor che te regala
di sensazion d'on paradis in terra.
Mai pù mi saggiaroo 'na medesina
col temp me ciapparà l'epidemia
di fever delizios de bella dònna,
che tègnen dolz el sangh con tenerezza.