Maester Vittori Pinott
Musicata dal Maestro C. Merli
De lontan me tampina 'na vos.
Ma chì l'è che me dis de cantà
i canzon pussee bei de Milan?
Ma l'è 'l rè del ball lisc ambrosian!
Propi lù, el Maester Pinott;
senza vista chì in terra, però,
la sù in ciel la soa sòrt l'è cambiada,
la passion de cantà me l'ha dada.
El tò amis Luisin l'ha inventaa
i paròll buttaa là con la ghega
tutta instessa che tì te ghe daa
ai canzon con l'arietta nostrana!
Oh car Maester Pinott,
lì tra i omber che sconden la sera,
in d'on canton del mè coo
gh'hoo 'l rigòrd d'ona nòtt in balera.
Oh car Vittori Pinott,
festa granda a l'è per Milan,
quand se risent a sonà
i quatter temp del tò lisc ambrosian!
Oh car maester Pinott,
sott al ciar che fa splend i baler
la gent la batt anmò i man
per el gran rè del ball lisc ambrosian.
Pioeuven de l'alt maneman
i gran virtù del Pinott,
resten sospes sù Milan
coi stell che brillen de nòtt.
La Madonnina anca lee
par che ghe pias ascoltà
on valzarin, vun de quei che te mett
l'argent viv, con baldanza, in di gamb...
quand in de l'aria se sent a sonà,
i canzon... del Vittori Pinott!