Brianza verda
Deslengua el giazz in vetta
e rifioriss al pian
el verd de la Brianza
intorna ai lagh.
On bagaiott ch'el canta
me mett in de la ment
anmò la narcisada
sul "Bus del Piomb"
Se l'anima l'è verda,
adess cont el progress
te gh'hett on còrp moderna
coi sò difett.
Brianza verda generosa e bella,
cambien i temp e tì te see pù quella,
de quand el Don Lissander con la pèna
l'ha miss i tò virtù in coo del mond.
Brianza bella, fior de fantasia,
t'hee conservaa anmò a malapèna
intata la radis che per magia
la te ridà anmò l'antigh profumm.
El Lamber 'dess el passa
tra 'l fumm di officinn.
E l'acqua semper netta
a l'è on bell sògn.
El Renzo e la Luzia,
dal ramm del lagh de Còmm
ritornen quand l'è festa
in sui sò pass.
Bell fior de Lombardia
dedent d'on vas prezios
de mett in bella mostra
al ciar del sô.
Fior di rigòrd d'on epoca passada
de mètt in de l'ogioeu de la giaghetta
del tò vestii quell noeuv
del dì de festa.