Madrigal per on amor

 Musicata dai Maestri C. Merli - U. Marino

Solitaria la luna stasera

la scarliga in del ciel silenziosa.

E in di sògn, la passion presonera,

per amor la se scond vergognosa.

Melodii de ghitar e canzon

cont i omber che lassen i stell,

in del coeur me vann lì in d'on canton

e per mì anca el brutt me par bell.

A cavall d 'ona scova la stria

lee la vola desora a la stella

che per sòrt la me spiana la via

e l'amor per dispett me scancella.

Senz'amor el me coeur, come prima,

fastidios e pesant me tormenta.

E rincori i mè sògn con la rima

d'on poetta de vèna foghenta.

Tucc insèma de capp i canzon

e i ghitar con la luna e coi stell,

me tampinen de noeuv la passion

d'on amor, che per mì l'è anmò quell!

A cavall d'ona scova ona stria,

con perizia la gira e la vola,

la se ferma desora a la stella

che a mì la me spiana la via.

Poeu la stria 'me nient con la scova

e l'aiutt di passion in ferment,

dent de mì in d'on moment me ripòrta

tutt l'incant che l'amor el me dà.