Ma se l'amor el gh'è...
La nòtt, l’è trista e silenziosa.
El scur el mètt in ombra
on dispiesè amar
ch'el scond in d'on abiss
la sensazion tediosa
amisa di rigòrd.
E dent del scur, insèma al vent
el temp el cor el và.
El grev torment però
indiferent el resta.
Ma se l'amor el gh'è...
sorid anmò la vita.
Quand denter di tò venn
te scor anmò i virtù
che sann de gioventù,
ti canta e poeu ricanta
che incoeu de noeuv l'amor
el t'ha ridaa la vita.
L'amor a l'è 'na giòia inmensa,
che l'è tant bell gustala.
Tucc i moment hinn bon,
l'età la cunta nient,
quand pròpi nò se pensa...
l'amor te fà l'oggin.
Ti và tranquill col coeur content,
el mond l'è semper quell;
tra i tanti sò color
gh'è el verd de la speranza.
Ma se l'amor el gh'è...
sorid anmò la vita.