La ronsgia del Sasse

 Musicata dal Maestro U. Torreggiani

Là in fond de la Magolfa

in doe finiva i cà

tra el bèll Navili Grand

e quell che và a Pavia,

tranquill senza premura,

con l'acqua verda e scura:

tra i òrt e l'inguriera

el bon profumm di praa,

correva li ona ronsgia

sul bòrd d'on vegg sentee

ciamada poeu de tucc

la ronsgia del Sassee.

L'era nò on mar

ma l'era on fòss

limpid e ciar.

L'era el Sassee

con tanti sass

come tappee.

Gh'era i fiolitt

dent in la ronsgia

biòtt 'me pessitt

semper content

svelt a nodà

contra corrent.

Pondà sù 'na rubina

niad de passaritt

faseven on concert

ch'el dava l'alegria

in mezz a l'aria fina

con l'acqua che se nina.

On temp gh'era la spiaggia,

e andaven lì a fà el bagn

i fioeu di bollettari.

Adess l'è tutt cambiaa,

l'asfalt cont el ciment,

la ronsgia hann scancellaa.