La ghisa feminista |
||
Al dì d'incoeu, se sà che in mezz del meccanismo del mond che inanz el và, di dònn la gran conquista, l'è dent del calderon scaldaa dal feminismo.
E lor, con sù i calzon, de colp a l'improvista hann scancellaa tuscòss del bell romanticismo.
Saltand de là del fòss, la ghisa feminista in sul sagraa del Dòmm, con quell sò gran cinismo compagn d'on ghisa òmm, a l'è protagonista del traffich a motor.
Elmett e la divisa, padrona del vapor, l’è lì de gran maestra desora del sgabell, mosetta de sgalisa, in mezz al gran bordell la tègn in sest l'orchestra.
Del feminismo, sì... la ghisa metodista... oh gent! Ve 'l disi mì! L'è on tòcch d'ona colòna! Però, de sòtt di pagn... l'è on tòcch de bella dònna!
(parlato) Ej lù!...Sì sì... pròpi lù!... Se 'l fà?... Concilia?
|
![]() |