L'osteria di mè amis de mì

 Musicata dal Maestro V. Pinotti

Tra tanti cà la giò in periferia,

doe Milan se slonga de lontan,

gh'è on giardinett bell verd con l'osteria,

che l'è on canton nostalgich foeura man,

con scritt in grand sul mur, tal qual inscì:

* L'osteria di mè amis de mì *

Gh'è là in periferia,

de l'Enzo e de la Chiara,

on fior d'on osteria.

E lee con la ghitara,

cont i amis de sera

la canta i sò canzon

e beven giò barbera

ma pròpi de quell bon.

E dent de l'osteria

l'Adele de la nev

la fà de la legria

la bala e poeu la bev.

E i mè amis de mì,

de tì, de lù, de lee,

se troeuven tutti lì

insèma ai forestee.

A gh'è l'ostessa bionda e prosperosa,

cont on soris sui laver delizios,

che pòrta de mangià ròba gustosa

cont on vinell superb e generos,

che l'òst el mett al fresch giò in di cantinn,

ma l'è minga mes'ciaa coi fontaninn.