L'orghenin se mett sonà

 

 

L'orghenin sòtt i stell se mett sonà

per chì in crocera el và in sù la luna.

E per la gent che stann coi pee perterra,

se podarissen vegh el cunt in banca,

fann quell che voeuren lor... l'è semper festa.

 

De l'orghenin ti mèna la manetta,

te sentiree sonà

on ritornell tant bell

che rigordà te fà, inscì 'me l'era

la toa gioventù.

 

Zinzetta forbesetta

mèna mèna la manetta,

sona sona l'orghenin

per chì tutt de sequella

el voeur domà ballà

con quella pussee bella.

 

L'orghenin, de sicur, quand l'è in azion

l'è lù l'ambasciador de la speranza.

Se sà ch'el cavalier e la damina

in del ballà, normal a l'è l'usanza

de mett in ciar on poo de simpatia.

 

E in visibili, l’orghenin je pòrta

sui ond d'on mar tranquill

in doe l'illusion

ghe fà toccà coi man la lampedina

che illumina el doman.