L'astronav de Rogored

 Musicata dal Maestro F. Patterlini

Con l'astronav special che la partis

da la stazion spazial de Rogored,

tra i pist celest che vann in sù la luna

a voo in crocera... a voo in crocera!...

Al momentin quell giust, el capp stazion,

col zofranell el pizza la bombetta.

Dal finestrin, amor, mi te saludi

e ciao Ninetta... e ciao Ninetta!...

On tron de temporal, fulmin e saiett,

fis'ciand tra i moviment di boff del vent...

e l'astronav de Rogored la và

lassù tra 'l voeui celest del firmament.

Guardee guardee o gent,cont el progress,

Milan coi sò navili de lassù,

el par de meraviglia, al ciar de luna,

perfin Venèzia su la laguna.

E l'univers adess senza confin,

I'ha miss el nòster mond in d'on moseo.

Panzanegh ambrosian per fà legria.

L'è nò bosia... l'è nò bosia!

Dò stell comett de bell, coi saresett

ghe fann cont i palett, el giust segnal...

e l'astronav la smòrza el sò motor,

la riva a la stazion... sul tecc del ciel.

E l'astronav se ferma arent a on mar

senz'acqua e cont i sass al pòst di ond,

con nanca on bastiment che navigava.

Nissun parlava... nissun sbrottava.

E dopo 'sta vision, el finis chì

tutt quell che gh'è de bell in sul pianetta.

Pur anca i ragg d'argent del ciar de luna...

che barzeletta... che barzeletta...

Son tornaa indree smorfiaa de 'sta crociera,

hoo vist la luna inscì tal qual 'me l’era.

Oej tì! Me car poetta, coi to sortid...

Romantica la luna??... Te me fee rid!

Oej tì! Mè car poetta, coi tò sortid...

Ma và ciappà di ratt!... Te me fee rid!