Inamoraa (duetto) |
||
Lee Te pias guardà la luna inscì romantica sul ciel?
Lù Sì, la me pias, però, me pias pussee guardà dedenter di tò oeucc per ben sentì visin el dolz profumm del tò sospir.
Lee Hinn tucc paròll che hann faa del gran furor coi sfond de poesia a bon mercaa dedenter di romanz del temp passaa! A mì me pias sentì i paròll d'amor, de quei che fann stà lì col fiaa sospes in gola.
Lù Me par che tì stasera te gh'hee 'na voeuja matta de tacccà lit con mì.
Lee Fà minga el malmostos e damm on bell basin!
Fuori campo La luna maliziosa per fà de paravent la scond i ragg d'argent dedree di frasch di piant.
Lù Quanti sarann i stell che splend in ciel?
Lee Ma mì 'l soo pròpi nò!
Lù Me metti adree cuntai!
Lee Quand t’hee finii, te me diree quant hinn.
Lù E voeuna e dò e trè... e me indormenti e sògni: De vègh on tòcch de ciel per mettel tutt distes de sòtta di to pee! Ma mì sont poverett te metti sòtt i pee domà i mè sògn d'amor! E tì caminegh sora con riguard... Te schiscet i mè sògn! Te raccomandi!
Lee Sui pont di pee instess di ballerin, leggera 'me 'na piuma... caminaroo desora di tò sògn! Te se content!
Assieme E sorident i stell ghe metterann quell certo non soo che desora di passion di nòster sògn d'amor!
|
![]() |