In sù la mia strada

 

 

'Na maliarda la me ciama, ma mi soo nanca

chi la sia, l'hoo mai vista, mai pù me fermi.

Ciappi in spalla la ghitara,

e tiri avanti disinvòlt

in sù la strada che la me pòrta a tramontana

 

In sù la mia strada, che nanca l'è sfaltada,

ghe foo la serenada al ciar de luna,

a on ghisa in bicicletta intanta ch’el pedala,

in sù la mia strada immaginaria.

 

La strada,coi lava veder de faccia scura

col sidell e spugna,

l'è quella che li spassegen a la ventura

per cercà fortuna,

insema ai voo comprà.

 

In su la mia strada,

dal temp desmentegada,

ghe foo la serenada,

con la ghitara,

a ona lusiroeula,

che la s'ciariss la sera

domà per mì...

in sù la mia strada.

 

La luna, che desòra de la strada

lì tra i stell la passa

tranquilla,

la slonga i ragg d'argent in terra,

la me saluda... pian pian la và! 

 

In sù la mia strada,

che a mì la me par mia,

sui còrd de la ghitara

canti stasera

ona romanza antiga

per digh a la fortuna

che anmò son chi spettà...

in sù la mia strada!