Guardèmes in di oeucc
(duetto)
Musicata dal Maestro V. Pinotti
Se l'Adige l'ha vist sui spond el dramma
del grand garbuj d'amor de la Giulietta,
che del Romeo a l'era la soa fiamma...
el nòster vegg navili, gran poetta,
m'ha miss in bocca a mì la poesia
per ditt: Te voeuri ben Palmira mia.
Guardèmes in di oeucc
con sentiment de poesia.
Guardèmes in del coeur
sincerament anima mia.
Stringèmes in di brasc
con l'abandon suttil de tenerezza.
Tegnèmes per la man
con la passion gentil d'ona carezza.
Sul fòss che taja in duu
senza reson la nòstra vita,
tra l'acqua di dò spond
e tanti fior de margherita.
Dal ciel per nun i stell,
d'argent farann on pont
coi ragg de luna
per fà passà sul fòss
el nòster grand amor!
Parlato:
Te strengi in di mè brasc
tosetta strana.
Balemm, sognemm
l'amor e ona capana
in d'on giardin fiorii.
Ma Robertino mì son nò patrizia,
a stoo de là del fòss con la liggera,
e ti de l'altra part con la giustizia.
Tra mì e tì gh'è lì 'na gran trincera
che l'è scavada in sgarb con la natura.
E fiss a gh’hoo on penser che me tortura.