Albanno juorno ‘ o gallo oggie ha cantato

chiù allegramente ‘e tutte ll’ati juorne

‘o sole ‘e  austo chiù bello s’è scetato

pittanno d’oro tutt”e cose attuorne

 

Na coppia d’aucelluzze ‘nammurate

se so pusate ‘ncopp’a nu balcone

addò na sposa già  s’èra scetate,

p’augurio hanno cantato na canzone

 

Se sentono ’e  campane già d”a chiesa

emuzziunata na mamma nu’ reposa

na vesta janca ‘ncopp’o  lietto stesa

aspetta che s’a ‘ngigna  chella sposa

 

Chiesa addubbata, ll’organo ca sona

na voce doce canta Ave Maria

na mamma chiagne e’ o  pate  se n’addona

e ha fatto ll’uocchie d”a malincunia

 

N’addore’ ‘e ‘ncienzo dint’a chiesa spase

ha prufumato tutto cosa attuorne 

‘a sposa  triste stà pensanno ‘a casa

‘a primma vota stasera nun ce torne

 

e pensa: ‘o lietto  suoie, ‘o cupertino

c”a mamma a’ sera spisso ‘a cummigliava

e stà pensanno mo’ chillu cuscino

‘e tutt’e suonno ‘a coppa ca sunnava

 

E chesta è storia antica universale

addò stà giuventù piglia cuscienza

è  sempe stessa è sempe tale e quale

è  nu punto d’arrivo i”è  na partenza

 

‘A strada è longa, guagliù nun ve fermate

teniteve p”a mano sempe aunite

che vvò significà ‘a mamma e’ o pate

a stu mumento sulo vuie ‘o sapite

 

Ma a chisti genitore che lle date

ma vuie ‘o  ssapite ggià chello ca vonne

c’ammore vuoste vuie ce rialate

Na criaturella pe fa chiammà nonne

                   

Vincenzo Giandomenico

La presente poesia non potrà essere pubblicata o utilizzata in qualsiasi altro modo, sia parzialmente che integralmente, senza il consenso dell'autore

Per avere informazioni su questo autore, o per leggere altre sue eventuali  pubblicazioni su Interactive People, fai clic Qui

Napoli  in poesia: Le più belle poesie di un Grande Poeta Napoletano