SEMPLICITA'

Murolo - Mazzocco


'O sole t'ha pittato sti capille,
'o cielo ha ricamato st'uocchie belle...
Quanno mme guarde tu lùceno 'e stelle
e 'a primmavera ride attuorno a me!

Semplicitá
tu tiene dint''o core...
e a 'o munno, nu tesoro,
cchiù bello nun ce sta...
Vicino a te,
mme scordo 'e tutt''e ppene
e cchiù te voglio bene
pe' 'sta semplicitá...
I' campo sulamente pe' st'ammore,
ca fa felice 'o core
e cchiù mm'attacca a te...
No, nun ce sta
n'ammore cchiù 'nnucente
cchiù semplice...cchiù ardente:
Tu si' 'a semplicitá.

Bona e sincera comm'a mamma mia,
tu si' ll'ammore ca nun more maje...
Si pure tu mme dice na buscía
è ingenua e santa comm''a veritá!

I' campo sulamente pe' st'ammore...
Ca fa felice 'o core
e cchiù mm'attacca a te...
No, nun ce sta
n'ammore cchiù 'nnucente,
cchiù semplice, cchiù ardente:
Tu si' 'a semplicitá!

(festival radiofonico della Canzone Napoletana 1954)