Natu, Luigi ed eu

Mi cuntintava mi ndaju 'ncutidduzzu,

cu 'mpezzu i catinedda, ndo bbrizzottu.

Luiggi ambeci aviva u cavadduzzu,

e a sira s'assittava ndo salottu .

Nu'nd'assittavimu antornu o focularu;

u nonnu ndi liggiva Bbarba nira,

po' ncignava a calari u curunaru.

Ndi passava ccussì, quasi'ogni ssira.

A 'mprima si faciva u signu i Cruci;

na mangiata i fascioli e tagghiarini,

e ppi ssicundu pani chi curcuci.

A mamma, zzitta,zzita, nnavanzava

u patri mi liggiva i scritti mei,

u nonnu, aviva sonnu, e ssi curcava.

E ssi rristava focu ndo bbrasceri,

me' patri, 'mpoc'a vota ndi cuntava,

un mmorsu di Parigi li misteri.

Me' zziu mi lu porta ‘i San Pascali

doppu se'uri di caminu appedi.

Statt'accortu nonn mmi t'a tagghiari,

e, mpariti mi fa' tutti i misteri

Mi fici carruzzeddi chi pittari.

Ndi fici mazzi, rroteddi e piriddi!

Chi canni mi faciva i me' zzambari,

mi tundiava i 'mbaddi pi nuciddi;

faciva bbrocci, spiti e cucchiareddi;

frischialetti, faciva, cu virghitu,

tagghia' hjnestra pi ffari lijameddi,

e ffici, pi me' soru, pupazzeddi.

Luiggi a scola non vuliva studiari,

nde jocura jarmava sempri zzizza ,

ma ogn'annu u facivinu passari

e nd'eppi sempri na' test'e curizza.

A scola si copiava u me' probblema,

cu me' cuteddu tagghiariava u bbancu.

A matina u purtava donna Mena,

pi cullazzioni mangiava pani jancu.

Non sappimu so' mamma chi ffaciva;

so' patri iv'angiru cu ddubbotti ,

a mmarinaru sempri lu vistiva,

e jjva caminandu jornu e nnotti.

Ndi Natu: picca cosi pi mangiari:

a mamma campi campi pi sculimbri,

u patri ca paricchia a llavurari,

dopu mangiari pulizzava i zzimbi.

Natu, mpara' liggendu ndo me' libbru,

e ppi travagghiu fici u muraturi;

pagava a tutti cu rrisu du so' labbru

e ccu la so' buntà e ssapiri fari.

Me' nonnu nd'ambizzava:

a maistra si dici signursi;

faciti sempri comu vi dich'eu,

e vecchiareddi chiamatili cu zzi,

o previti signur'addittireu.

Si caminandu ammenz'a li hjumari,

vu rrincuntrati o medicu dutturi,

quantu vi dissi v'aviti a rricurdari:

vu caminati avanti e iddu arredi.

Passaru, n'atru pocu, sissant'anni,

e ttuttu non mmu pozzu rricurdari:

quantu bbasta pi llavari i panni,

e, ssi carcunu si voli 'mparari.

A Natu u vidu quasi ogni matina:

facci pulita e cammiscedda i tila;

ogni ttantu si spasseggia a niputina

e ss'arricorda chi ffu cumpagn'i scola.

Luiggi: ancora s'av'a llauriari,

ogni simana u leggiu ndo ggiurnali;

nu posticeddu o friscu s'app'a truvari:

ndavi trent'anni chi studia a S.Vittori.

Ddu cutidduzzu ancora esti cu mmia

mi tagghia 'mmorsu i pani, zzittu e lentu

mi fa' piaciri la so' cumpagnia

e speru non mmi perdu u 'nsignamentu.

Mungipeddu

Si Mungipeddu teni l'occhi chiusi,

i ggenti, so' vicini, su filici.

Cu poti custruiri faci casi,

‘nda fadda e nde filesi di pindici.

Cu poti chianta mmenduli e ccirasi,

carcunu si rrimpettica cchiu ssupra,

quantu mi s'alluntana i Nicolosi,

mi poti campari 'an santa paci.

E, Mungipeddu: pari fatt'apposta,

dormi, ndavi tant'anni, senza sosta.

Si ‘mbidda, s'arrussigghia carchi ssira,

e ffaci terra chiana tutt'antornu,

mmenduli, cirasi e pedi i pira.

Ma 'ntantu i Rripustini e i Ggiarratani,

jru campandu... mari cristiani.

Japriru strati, ficinu canali,

ficinu mura, und'erinu sipali;

casetti e casitteddi nde pagghiara

di Taormina...nsina a farrubbara

Ma na matina du misi d'agustu,

quandu mi dormi non sintiu cchiu gustu,

i bbotta a' mbotta s'arrussigghiau,

e tantu i chiddu focu bbombicau

i casi si spasciaru, i mura sdirrupau,

e, di dda ssupra nsina a marina,

cinniri, ginesa e focu bbampau!

Mi rresta sempri zzittu, s'ancrisciu.

Cu potti, e comu potti s’a fuju!

I morti furu assa', ndi libbira Ddiu

Ammenz'a ttutti ddi sdirrupatini,

na bbella ragazzina si sarbau,

ma quandu fu cchiù randi si ndi ju

e, nu furisteri, a po' si maritau:

cu tempu eppi na figghia ch' Italia, chiamau.

Chidd'atri chi camparu, a llungu tempu

Mpocu pi vvota si jru rricugghendu.

‘Ncignaru a spetrari 'mpezzu 'i campu,

e mmenduli e ccirasi jru chiantandu.

Nde cchiù mbasci: rangiareddi,

e... cchiù ssupra, nde pitrari

... chiantaru puru i ficarazzari!

‘Nsina chi Mungipeddu dassa fari.

I cirasi i 'mpari Bbrunu

Bbrunu si cugghiva i Fasulari,

chi cufineddi carrichi i cirasi,

versu Caruccia, rrivau a sso cumpari,

aniti si ndi jru pu paisi.

U sceccu non mputiva caminari,

pu tantu ppisu di li cufineddi,

e, Bbrunu pi mmu faci truttiari,

ogni ttantu jttava...ggridiceddi.

Jhjhjhjhjh... e ccorpa di bbastuni,

jhjhjhj e, u sceccu ccuminzava a truttiari,

jhjhjhj jnchendulu di purbiri o cumpari.

Ma Bbrunu si rricorda, ndo stramenti,

mi nc'ioffri ddu cirasi o so parenti.

" Pigghiati cirasi, me cumpari! "

Chiddu circava pi mmi llonga i mani...

jhjhjhj... e, u sceccu ncuminzava a ttruttiari,

e, a bbava nci spuntava comu o cani.

Jhjhjh.. "cumpari pigghiati cirasi."

jhjhjh..... e u sceccu rripigghiava a cursa,

.... ggià stavinu rrivandu ndo paisi,

mentri u cumpari si ddiccava i mussa.

Mi piaci a vostra..'fferta, me cumpari,

ma s'u sceccu no nsi ferma un ssicundeddu,

i vostri cirasi né mangia nisciunu....

... purtativvilli a casa ... a ccufineddi.