Un coretôr ortografic di fonde al è un program che al verifiche che lis singulis peraulis di un test a sein ancje te liste des peraulis coretis che al cognòs, câs contrari al sugjerìs une o plui peraule corete che a samee a chê falade. Dispès il coretôr ortografic al è fat in mût di podê corezi in plui lenghis, par ognidune al varà une liste diferente di peraulis coretis.
Pal plui il coretôr nol ven doprât diretementri, ma ben al è il program dulà che si scrîf (word processor, sfuei di calcul, program di pueste eletroniche e v.i.) che par fâ il control ortografic si poie su di chest.
Aspell, Ispell e Myspell a son trê coretôrs ortografics libars e multilengâi che a vegnin doprâts de plui part dai programs libars che a àn dibisugne de corezion ortografiche. Culì si cjate il dizionari (=la liste di peraulis coretis) pal Furlan par ognidun dai trê coretôrs.
Lis peraulis dai dizionaris (a son simpri chês ma ogni coretôr al vûl la liste in un formât un pôc diferent) a son stadis gjavadis fûr metint adun lis peraulis dal Grant Dizionari Bilengâl Talian-Furlan e chês dal dizionari par Aspell dât fûr de Societât Sientifiche e Tecnologjiche Furlane. Cun di plui e je stade zontade la flession interogative-otative par ducj i verps presints tal Grant Dizionari.
Si è rivâts cussì a ingrumâ passe 380.000 peraulis (il dizionari de SSTF a'nd à 30.000).
INSTALE.txt dentri ogni dizionari.