Atlantis La furtuna 'A vita è 'na taranta Acevera e ammatura Cajal Candelora Nennella Il maestro d'acqua Figli d''o cielo Pullecenella e 'o mare Ammore tu Pithecusa Alfredo (bonus track)

Carmine Bruno, Gino Evangelista, Gianni Lamagna, Corrado Sfogli,
Michele Signore, Fausta Vetere, Pasquale Ziccardi

Atlantis

strumentale (chitarra classica, violino, tastiere, mandoloncello, percussioni, flauti, samples e voce)

La furtuna

E gira gira ‘a luna,
e gira la furtuna,
mò vene e nun ‘o dice a nisciuno.

E si int’’a ‘nu mumento
cade ‘ncuoll’’a gente,
cagn’’a vita e chi nun tene niente.

‘I’ l’aggio aspettata,
jurnata pe’ jurnata,
for’’e grade d’’a Mmaculata.

E m’aggio fatt’’a croce
cu’ l’acqua e dint’’a chiesa,
me so’ assettata e niente è succieso.

Furtuna mia,
a quanto tiempo,’o ssape Dio,
furtuna mia,
tu sì comm’’a ‘na rosa
e ‘ì songo ‘la spina

E po’ venette ‘a festa,
redevano ‘e feneste,
quanta gente pe’ ‘mmiez’’a via.
E s’arapett’’o cielo,
e se giraie la luna,
cadette ‘mbraccio a me la furtuna.

Filastrocca :
Sì Sabella è ghiut’’a messa, e cu’ quatto principesse
e cu’quatto cavallucci, musso ‘e vacca e musso ‘e ciuccio…
‘A recotta n’è fellata,e magnammece ‘a ‘nzalata,
‘a ‘nazalata nun c’e uoglio,e chiamammo a mastu ‘Mbruoglio….
Sega sega mastu Ciccio, ‘na patana e nu saciccio,
‘a patana ce ‘a stipammo, e ‘o saciccio ce ‘o magnammo….

Furtuna mia,
a quanto tempo, ‘o ssape Dio,
furtuna mia,
‘ì so comm’’a ‘na rosa
e tu sì ‘na spina,
tu sì ‘na spina….

‘A vita è ‘na taranta

T’ha voglio regalare ‘na canzone,
t’ha voglio regalare ‘na canzone,
a te cu l’uocchie nire comm’’a gravone.

Ombra d’amore nun la puoi sanare,
ombra d’amore nun se po’ sanare,
sulo cu l’acqua ‘e mare la puoi lavare….

L’ ammore abbrucia ‘o ffuoco int’’a lu core,
e quantu fuoco dint’’o core mio,
ca nun ce abbastarrà, tutto lu mare della terra mia…

Oi ma mamma ‘a vita è ‘na taranta,
gira, vota, pizzica, te mozzeca…

E quann’’a sera appiccia la cannela,
e quanno ‘o cielo appiccia la cannela,
‘o ffuoco ca ce sta s’arrobba ‘o core‘e tutt’’e ‘nnammurate..

E una sola tu non la toccare,
e una sola non la puoi toccare,
ca tene l’uocchje nire e addora ‘e mare..

Oi ma mamma ‘a vita è ‘na taranta,
gira, vota, pizzica, te mozzeca

Acevera e ammatura

Aggio saputo ca mò vuò partire,
scerocco e maletiempo pozza fare…
Pe’ chelli parte ca te ne vuò ire,
puzz’’e funtane pòzzano seccare….

Simmo brutte, simmo belle,
simmo d’’o vico de Paparelle,
e llena e llena n’’o tirà ca se ne vene…

Là ce stanno ‘e ninne belle
fann’ammore cu ‘e zetelle,
e bbà e bbà oi comm’’o sanno fà.

Sò zetella e teng’’onore,
‘o pappagallo dint’’a cajola
a ccà e a llà ‘nu vaso ‘mmocca t’aggia dà…

Si me mannan’’a Parete
llà me mecc’anielle ‘e dete,
e bbà e bbà ‘nu zumpo ‘ncuollo te voglio fà…

Quann’’e femmene vann’’a messa
teneno sempe ‘a pettenessa,
e bbà e bbà ‘na cantata vulimmo fà….
Sott’’a prevola nasce l’uva,
primma acevera e po’ ammatura,
oi ccà oi llà, và lu viento a tuculià…

Sapatella Sapatella pappafica e ricuttella,
pappafica e ricuttella Sapatella Sapatella..
A tutt’’e femmene ca so’ pazze
‘e corro areto cu’ ‘sta mazza
e dalle e dalle e spugnavete ‘o tarallo….

Santulè che cor’ hê avuto
‘o serraglio m’hê mettuto
che core ‘ngrato ‘o serraglio m’hê mannato..

E bbà e bbà ‘nu vaso ‘mmocca t’aggia dà
‘nu zumpo ‘ncuollo te voglio fà
Core ‘ngrato ‘o serraglio m’hè mannato
Santulè chi c’è purtato…
E sott’’a prevola jesce l’uva
e primma acevera e po’ ammatura...

Cajal

strumentale (chitarra classica, violino, mandoloncello, chitarra portoghese, mandolino, launeddas, percussioni, basso e chitarra acustica)

Candelora

Quanno veneva ’o tiempo ‘e Cannelora,
ferneva ‘a robba vecchia e asceva ‘o nuovo…
E tutt’’a terra comm’a ‘na figliola,
s’appriparava p’avè ‘a benerizione….

E tutte quante gruosse e piccerille
cannele ne appicciavano a cchiù ‘e mille,
pe’ mannà fòra ‘o mmale ‘a dint’’e case,
e pe’ vasà ‘e mmane a l’anno ca trase…

Siente siè,
‘stu sole che r’è,
t’accarezza comm’’a ‘nu rre

Siente siè
chest’aria che r’è,
è tiempo ‘e musica ‘mpietto a mme

Magnammo amici miei e po’ bevimmo,
fin quando ce stà uoglio a la lucerna,
chissà si a l’auto munno nce vedimmo,
chissà si a l’auto munno nce stà taverna…

Siente siè,
‘sta terra che r’è
è riggina senza ‘nu rre…

Siente siè,
‘sta festa che r’è,
gir’’o munno attuorno a te……

Guagliona mia si vuo’ fa’ lu ballo,
nun t’aiza’ la vesta ‘o primmo ‘e l’anno

Nennella

E’ nata ‘na stella,
‘a voglio sempe guardà…
E’ comm’a ‘na figlia,
ca nun sape ancora parlà.

E và nennella mia,
nun te fermà,
scigliete ‘a meglia via,
pe’ cammenà..
E nun guardà maje ‘nterra
nun ‘o ffà,
pigliate tutt’’a vita ca ce stà.

Te voglio terra bella,
terra bella e libera..
Bella,
terra bella e libera.

E và nennella mia,
và a la truvà…
Juorne e palazze ‘e seta
‘e può tuccà.
E quanno sì arrivata,
nun sbaglià…
Sciglie chillo cchiù bello
e aspetta llà…

Te voglio terra bella,
terra bella e libera..
Bella,
terra bella e libera.

E’ nata ‘na stella,
‘a voglio ancora guardà..
‘A primma parola
che ha ditto pe’ me chiammà
è stata ‘a voce d’’a libertà

Il maestro d'acqua

E’ sulo terra secca ‘a guardà,
manco ‘nu filo d’evera p’addurà,
‘o sole abbrucia senza avè pietà…
Chesto è chello ca m’ha dato Dio,
e chesta è ‘a casa mia….

So’ prete ‘a meliune ‘e può cuntà,
e quanno vott’’o viento vuò alluccà,
ma si schiara ‘a luna è ‘a prià,
’o cuntrario ‘e tutta ll’ata gente,
ca vene maletiempo.....

E stò aspettanno ccà,
sunnan’’o cielo vestuto ‘ e nuvole,
tutt’attuorno a mme,
belle a lle verè……..

E’ acqua benedetta, l’hê ‘a truvà,
‘nu surco dint’’o ffuoco hê ‘a scavà
comm’’a ‘na criatura l’hê ‘a purtà,
l’acqua corre sempe dint’’o mare
se sperde e se fà amara…..

Ma quanno ‘mmiez’’e case sì arrivato,
e‘o ballo sott’a luna è accumminciato,
pe’ chesti gocce sante c’hê purtato,
staje cuntento e te siente appaciato..
T’astrigne ‘nzieme a ll’ate….
 

Stò aspettanno ccà,
e guardo ‘o cielo senza cchiù ‘e nuvole,
stò aspettanno ccà,
venite a me chiammà

Figli d''o cielo

E vene la stagiona nova,
‘e juorne pigliano culore,
‘o culore d’’a suttana
c’‘a nonna m’ha rialato….

E ‘ì m’ha metto tutt’’e sere,
ce faccio crescere ‘e penziere,
‘e penziere dint’’a suttana
c’‘a nonna m’ha rialato….

Comm’ajere,
for’’e balcune….
Comm’’ajere,
figli d’’o cielo…

E passa ‘o viento ‘e primmavera,
dint’’e lenzole quann’’è sera,
primmavera dint’’a suttana
c’‘a nonna m’ha rialato….

Comm’’ajere,
for’’e balcune….
Comm’’ajere,
scaveze e annure……

Figli d’’o cielo…

Pullecenella e 'o mare

Te piace ‘o viulino?
Sì,sì,sì…
E ‘a foto sott’’o pino?
sì sì sì…..
Uè uagliò chesto è ‘o popolo ca ‘o vò.

Te piace ‘o mandulino?
Sì sì sì…
E ‘o cuoppo cu ‘e lupine?
Sì sì sì

Uè guagliò
chesto è ‘o popolo ca ‘o vò

Pullecenella ,guard’’o mare,
nun vede cchiù ‘a luntano‘a luce d’’e lampare…
Quanta facce ha avut’’a fà,
e quanta zumpe pe’ putè campà….

Te piace ‘a chitarrina?
Sì sì sì…
E ‘o ghiaccio dint’’o vino?
Sì sì sì..
Uè guagliò
chesto è ‘o popolo ca ‘o vò

Quanta strada ha camminato,
e quanta pare ‘e scarpe che ha cunzumato…
Ha girato tutt’’o munno
e pure si è caduto nun è gghiut’’a funno…

Uè guagliò
chesto è ‘o popolo ca ‘o vò

Pullecenella ,guard’’o mare,
nun vede cchiù ‘a luntano‘a luce d’’e lampare…
Quanta facce ha avut’’a fà,
e quanta zumpe pe’ putè campà….

Uè,uè,uè,uè, Pullecenella ha vist’’o mare….

Te piace ‘o viulino?
Sì sì sì

Ammore tu

Comme si bella pare ‘na Madonna,
sì comm’’a ‘na nennella quanno dorme,
e ‘sti capille d’oro,
s’hanno arrubbat’’o core,
ammore ammore tu……….

I’ t’aggio visto ch’eri piccerella,
cu’a primma vesta e ‘a nocca dint’’e capille,
e quanno m’’ê guardato
‘ncielo me sò truvato
Ammore amore tu….
 

L’ammore ca vogl’ì’ mò stà luntano
L’aggio perduto e ‘o core s’ha purtato
‘e sere d’’a stagione,
cantava ‘na canzone,
ammore ammore tu…..
 

I’ nun m’’a scordo l’acqua a la funtana,
quann’aspettavo e ‘o core m’abbruciava,
me pare ‘nu ricamo,
‘o tiempo ca è passato,
ammore ammore tu…..

Chissà addò staje,chissà si turnarraje,
chissà ‘e tutte ‘e vase ca ne faje ?
E ì’ c’aspetto ancora,
‘na parola sola,
ammore ammore tu…
E ì’ c’aspetto ancora
‘na parola sola,
ammore ammore tu,
ammore ammore tu

Pithecusa

 Alfredo (bonus track)

Vicienzo ce ha creduto,
Carmela c’è caruta,
Alfredo nun c’è gghiuto
pecche’ s’è addurmuto…
E nun se sente bbuono
se vede ‘nfaccia ‘o muro
e sta vuttanno’ncuorpo
senza sentì addore….

Alfredo ‘o ssape bbuono
‘a vita nun perdona,
e quanno nun t’’o aspiette
sì rimasto sulo,
e vaie pe’ ‘mmiez’’a gente
nun te ne ‘mporta ‘e niente,
l’uocchie nun ‘e vire
‘e voci nun ‘e siente…..

Vulesse addeventare
comm’a ‘nu viento ‘e mare,
Vulesse addeventare
viento pe’ ‘ncopp’’o mare…

Quanta gente ca è rimasta sola
se spenne tutt’’a vita
‘ncantata ‘nnanze a na’ televisione….
Quaterna,cinquina,nun jesce mappina,
‘o terno nun serve,è addeventato niente..
S’arrevota ‘sta pupulazione
n’abbasta ‘a devozione,
overo s’hadda stregnere ‘o cazone
ma si vene ‘a matina ca jesce ‘a cinquina mappina,
tutt’’a Capodichino e Mergellina…

Vulesse addeventare
comm’a ‘nu viento ‘e mare
Vulesse addeventare
viento pe’ ‘ncopp’’o mare…

E passano ‘e jurnate
‘e panne l’ha lavate,
e a dinto nce’ha lassato
chi l’ha turmentato…
Ma ce ha penzato bbuono
‘a porta nun l’ha chiusa
e aspetta tutte ’e sere
‘a voce ‘e ‘na criatùra,
‘a voce ‘e na’ criatùra…

Vulesse addeventare
comm’a ‘nu viento ‘e mare
Vulesse addeventare
viento pe’ ‘ncopp’’o mare…

‘a voce ‘e na’ criatùra…