Jesce sole

Jesce sole
nun te fa cchiù suspira'
siente mai
ca li ffigliole
hanno tanto da pria'

Jesce sole
sole
jesce sole!...

E' nata mmiez''o mare na scarola
li turche se la jocano a premmera

Chi pe' la cimma e chi pe' lu streppone
viato a chi la vence a sta figliola

Sta figliola è na figlia de notaro
e 'mpietto porta na stella diana

Pe' fa' muri' ll'amante a ddoie a ddoie
quanno rompe la luna a lu levante

E la luna e la luna
tutt''e ffemmene stanno annura
All'annura e senza panne
mò ch'è 'a festa 'e san Giuvanne
San Giuvanne san Giuvanne
è na crapa ca se scanna
E' na crapa è na crapa
è nu cuollo senza capa
E' nu cuollo è nu cuollo
primma è tuosto e doppo è muollo
Primma è tuosto primma è tuosto
comm'abballa 'o sango nuosto
E lu sango e lu sango
e lu mare se fa janco
E lu mare e lu mare
e 'o vacile l'arrepara
'O vacile 'o vacile
e 'o curtiello sott''e pile
'O curtiello 'o curtiello
'o ricchino e 'o capetiello
'O ricchino 'o ricchino
e na votte china e vino
E na votte e na votte
nu pertuso tene sotto
Nu pertuso nu pertuso
'ncopp''o lietto se l'è 'nfuso
E nu lietto e nu lietto
e nu cuoppo de cunfiette
E nu cuoppo e nu cuoppo
e nu fecheto de puorco
E nu fecheto e nu fecheto
e nu gallo cu l'arteteca
E nu gallo e nu gallo
san Giuvanne va a cavallo
Va a cavallo 'mmiez''o mare
nu capone e nu cumpare
Nu capone nu capone
ce 'o tagliamm''o cannarone
e ce 'o facimmo cu 'o limone
e pure frateto è ricchione

E alli uno
e alli uno
e alli roie
e alli roie
e alli tre
e alli tre
e alli quatto
e alli quatto
e alli cinche
e alli cinche
e alli sei
e alli sei
e alli sette
e alli sette
e alli otto
e alli otto
e scòmpale 'a capa
e dàlle na botta
pe' sotto e pe' coppa
uh!...

Chi nasce annuda e chi nasce 'ncammisa
Io ca nascette annuda e senza niente
aspetto ca pe' me cagna lu viento

Chi nasce cane e chi nascette gatta
Io ca nascette gatta e no canillo
aspetto 'e m''o 'ncappa' nu suricillo

Chi 'a tene 'argiento e chi la tene d'oro
la caiulella pe' 'ncappa' 'o palummo
e forse io sola 'a tenarraggio 'e chiummo

Chi nasce 'ncunia e chi nasce martiello
Si stu martiello 'ncasa e nun m'apprezza
pure vene lu juorno ca se spezza

Chi nasce janco e chi niro gravone
Io mò gravone so' ma te n'adduone
lu juorno ca m'appicciarraggio bbuono

'A primma vota ca me spusaie
nu navigante io me pigliaie
p''o primmo viaggio io me 'mbarcaie
e nfri nfro nfra
E quanno 'a nave trasette 'mpuorto
Maritu mio mò stance accuorto
ma 'a sera stessa
'e vvele acalaie
a poppa tuzzaie
po' s'affunnaie c''o nfri nfro nfra...

'A siconda vota ca me spusaie
cu nu surdato io m'attaccaie
e a ffa' la guerra po' me 'mparaie
e nfri nfro nfra
Ma 'a primma notte d''o serra serra
Maritu mio che ffaie 'nguerra
Apprimma avanzaie
po' se ritiraie
'a bannera acalaie
perdette 'a guerra e cchiù nun turnaie
e nfri nfro nfra...

E 'a quinta vota ca me spusaie
de nu mariuolo me 'nnammuraie
ca 'a chiava faveza me rialaie
e nfri nfro nfra
Ma tutt''e notte pe' dint''o scuro
vuleva rompere 'a mascatura
Io l'avvisaie
ma isso furzaie
po' jastemmaie
e 'a chiava faveza se spezzaie
e nfri nfro nfra...

E 'a sesta vota fuie 'o destino
nu sunatore c''o viulino
ca m''o faceva nu cuncertino
e nfri nfro nfra
Ma po' facennome 'a serenata
tutt''o strumento s'eva scurdato
e 'o "mi" pruvaie
a "re" tuccaie
ma nun fuie capace
e i' ce 'o cantaie st'atu requie e pace
e nfri nfro nfra...

'E chistu passo l'aggiu pruvato
aroppo 'e chisto ancora n'ato
ma a tuttuquante l'aggio atterrate
e nfri nfro nfra

E mò arapimmo stu testamiento
ma senza spennerce nu lamiento
Nisciuno 'e lloro me lassaie niente
e nfri nfro nfra...

Che bella vocca
ca tene 'a primma sora
L'ha fatto apposta
cu chella vocc''a fora
Quant'è bell''a primma sora
me n'ha fatto 'nnammura'
Vucchea 'a ccà
vucchea 'a llà
cu chella vocca te vo' vucchia'

Che belli mmane
ca tene 'a siconda sora
L'ha fatto apposta
cu chelli mmane 'a fora
Quant'è bell''a siconda sora
me n'ha fatto 'nnammura'
Manea 'a ccà
manea 'a llà
cu chelli mmane te vo' mania'

Che bella zizza
ca tene 'a terza sora
L'ha fatto apposta
cu chelli zizze 'a fora
Quant'è bell''a terza sora
me n'ha fatto 'nnammura'
Zezzea 'a ccà
zezzea 'a llà
cu chelli zizze te vo' zzezia'

Che bellu culo
ca tene 'a quarta sora
L'ha fatto apposta
cu chillu culo 'a fora
Quant'è bell''a quarta sora
me n'ha fatto 'nnammura'
Culea 'a ccà
culea 'a llà
cu chillu culo te fa scula'

Che bella panza
ca tene 'a quinta sora
L'ha fatto apposta
cu chella panza 'a fora
Quant'è bell''a quinta sora
me n'ha fatto 'nnammura'
Panzea 'a ccà
panzea 'a llà
cu chella panza te vo' spanza'

Che bella cosa
ca tene 'a sesta sora
L'ha fatto apposta
cu chella cosa 'a fora
Quant'è bell''a sesta sora
me n'ha fatto 'nnammura'
Te cos''a ccà
te cos''a llà
cu chella cosa te cusarra'

- Mamma mamma che bella cosa
si me lu faccio chistu vel''e sposa
e si riggina io pure ce addivento
a Cennerentola faccio schiatta' -

- Zitta mia figlia ca bene ti voglio
primma 'e stasera te faccio spusa' -

- Sine mamma già me veco
cu nu manto e la curona 'ncapo
ce ll'aggio fatto bbuono stu penziero
e tu nn'haie da dubita' -

- Si sta furtuna avota pe' essa
com'a riggina io pure starò
E te li faccio li cumplimenti
pe' sti bellizze ca aute nun ce ponno -

- Io saccio bbuono ca nun dice buscia
e ca me dice la verità -

- E mò ca la sciorta ce stenne la mano
'nzieme a Palazzo nuie jammo a balla'
E cu violin'e violoncelle
cu violoncell'e triccabballacche
tengo na figlia cu mmeza pacca
ca cchiù zetella nun vole resta' -

- E quanno saranno feste e festine
'mmiez'a la tavula miette lu vino
sa quanta brindese vulimmo fa'
ih quanta brindese vulimmo fa' -

- E statte sicura ca tutto va bbene
si spuse lu re a mme me conviene
vire che ddote ca te faciarrà
vire che ddote ca te faciarrà -

- E non tengo dote e non tengo niente -

- Ma tiene na cosa ca vale pe' ciento -

- Nun saccio si abbasta pe' m'addota'
nun saccio si abbasta pe' m'addota' -

- E si è pe' la dote ca tu te lamiente
tengo 'e cuntante ca so' quattuciento
'a fora sta dote stu dunamiento
stu curniciello t''o dace mammà -

- E chi porta mmiria pozza crepare
e pozza crepare e pozza schiattare
mò ca è lu tiempo 'e ce spusa'
perle e lazziette lu rre me farrà -

- E tutta la pupulazione
me purtarrà rispetto e devuzione
e quanno passo comm'a na prucessiona
addenucchiato ognuno sta -

- E addenucchiateve quanno io passo
pass''a riggina 'e chesta città
e addenucchiateve quanno io passo
pass''a riggina 'e chesta città -

- Figlia figlia jesce e abballa -

- Patre patre nun pozzo asci' -

- Figlia figlia pecché pecché? -

- Jé nun pozzo accumpare' -

- Figlia figlia e che te manca
figlia figlia e che te manca? -

- A mme me mancano li cazette -

- E ghiette 'o monaco e accumparette
e li cazette lle facette -

- Figlia figlia jesce e abballa -

- Patre patre nun pozzo asci' -

- Figlia figlia pecché pecché? -

- Jé nun pozzo accumpare' -

- Figlia figlia e che te manca
figlia figlia e che te manca? -

- A mme me mancano li ricchine -

- E ghiette 'o monaco malandrino
e lle 'nfilaie li ricchine -

- Figlia figlia jesce e abballa -

- Patre patre nun pozzo asci' -

- Figlia figlia pecché pecché? -

- Jé nun pozzo accumpare' -

- Figlia figlia e che te manca
figlia figlia e che te manca? -

- A mme me mancano li scarpette -

- E ghiette 'o monaco e accumparette
e li scarpette lle facette -

- Figlia figlia e ll'ariatella
jesce e abballa ca pare bella
l'anno passato ire zetella
mò si ffresca pe' mmareta'
pigliatille chisti cunfiette
'o muccaturo pe' ddint''o lietto
'o muccaturo lle pare scuro
'a senga e 'o monaco rint''o muro
'a mamma 'o caccia nu pere annuro
'a principessa e 'a pettenessa
'a peresina e 'o mantesino
'a suttanina e 'o principino
e c''o papuscio e 'o pere le struscia
e 'o pato che ttene 'o tene muscio! -

strumentale (chitarra)

O Lucia miau miau
gatta canta janchiata
quanno cucula antrasatta
fa cu tia cuccurucuccu
rucca rucca
fa la rota
gira 'ntuorno aiza cora
bene mia
miau miau cuccurucuccu
gatta e cucula 'ncalora
scioscia tua fuculara
Giorgetiella vo' abballara

Trava 'mpietta ce ha menata
tua bellezza negrecata
alla pietra 'nnammurata
tuzzulea la pretiata
vocca tua
'nzuccarata
occhi tua zizza tua
cula tua
Giorgetiella disperata
cchiù nun passa la nuttata
tozza capa e fa sospira
a tua porta vo' trasira

Falla trasa pe' sta senga
brutta schiava ca mò venga
luna 'nciela cresce e ammanca
fa la rota e nun se stanca
fa la rota
va e viena
addeventa luna chiena
panza priena
lassa attizza sta lucerna
core tosta de piperna
ma cchiù tosta capa mia
si nun rumpa gelusia

Miette uoglia a la carsella
tutta ciela a pecurella
vienta aiza la vunnella
crai acqua a catinella
piglia acqua
sta 'nfenesta
arrepara mia tempesta
in tua testa
sette pecure accuvata
fatta bbona la quagliata
cuccuruccu l'ha liccata
comm'a lladra svergognata
tu biata
furtunata
'ncannacata
'ncurunata
sienta cuccuruccu la canzona
vola 'nciela penna de pavona
pavunessa metta sua curona
me sa buona
liuta sona
sona liuta
negrecuta
mora e campa
campa e mora
io mo moro
cuccuruccu miau miau
cuccuruccu miau miau
cuccuruccu miau miau
cuccuruccu miau miau

Che se magnaie la zita a pprimma sera che
che se magnaie la zita
che se magnaie la
che se magnaie la
primma sera

La primma sera ca 'nce se cuccaie
la primma sera ca
'nce se cuccaie

'A primma sera ca se cuccaie
a essa venette 'o friddo

A essa venette 'o friddo e a isso 'a freva

Se ne fuiette comm'a na mariola
a na mariola

Che se magnaie la zita la primma sera
la primma sera
la primma sera

Che se magnaie la zita la siconda sera...

Che se magnaie la zita a ssiconda sera
che se magnaie la zita
quanno ricette
quanno ricette

Chest'è la varca
chest'è la varca si vuo' navigare

Chi sarrà chi sarrà
chesta bella furetana
principessa o gran puttana

Che sarrà che sarrà
che sarrà chesta schiattiglia
crepa 'ncuorpo mamma e ffiglia

E lle dicette quanno fuie a mmare
chest'è la varca si vuo' navigare

A essa venette 'o friddo e a isso 'a freva

Se ne fuiette comm'a na mariola
a na mariola

Che se magnaie la zit''a siconda sera
siconda sera
siconda sera

Che se magnaie la zita alla terza sera
che se magnaie la zita alla terza sera...

- Piglia 'o cane acchiappa 'o cane
'a capa d''o cane 'o cane 'o cane -

- Oi mamma ca mò vene -

- bim bom bà -

- Apre la porta e fallo trasi' -
c''o 'mbamberambà e 'o 'mbamberambì -

- Oi mamma ch'è trasuto -

- bim bom bà -

- Piglia la seggia e fallo assetta'
c''o 'mbamberambì e 'o 'mbamberambà -

- Oi mamma s'è assettato -

- bim bom bà -

- Pripara la tavula e fallo magna'
c''o 'mbamberambì e 'o 'mbamberambà -

- Oi mamma c'ha magnato -

- bim bom bà -

- Pripara lu lietto e fallo cucca'
c''o 'mbamberambì e 'o 'mbamberambà -

- Oi mamma s'è cuccato -

- bim bom bà -

- Piglia 'o curtiello e vall'a scanna'
c''o 'mbamberambì e 'o 'mbamberambà -

- Piglia 'o cane acchiappa 'o cane
'a capa d''o cane 'o cane 'o cane

Na fuiuta
na curruta
na sagliut'a mezanotte
uno roie tre e quatto
cinche sei sette e otto
'a campana fino a ddurece
fuie 'a gatta e pur'e surece

Oi mamma ca mò vene
'a capa d''o cane 'o cane 'o ca' -

- E scavezo rummane
'o pere e ammore -

- Piglia 'o cane acchiappa 'o cane
'a capa d''o cane 'o cane 'o ca'! -

Napole Napole donna bella
l'he perduta la chianella
La chianella la corona
al re di Francia e d'Aragona
La chianella la fantasia
al re di Spagna e di Turchia
Napole Napole donna bella
senza chianella
Napole Napole bella sirena
la luna chiena
la luna nova
Ogni soldato ci fa la prova

Son donne belle
son sei sorelle
son tutte belle
per far l'amor!

Son sei sorelle
son tutte belle
son tutte belle
per far l'amor!

E c'è la prima
ch'è piccolina
ch'è piccolina
per far l'amor!

C'è la seconda
ch'è bruna e bionda
ch'è bruna e bionda
per far l'amor!

ma per la terza
ci vuol la sferza
ci vuol la sferza
per far l'amor!

E c'è la quarta
che fa la sarta
che parte in quarta
per far l'amor!

E c'è la quinta
che fa la finta
vergine incinta
per far l'amor!

E c'è la sesta
che va alla festa
che va alla festa
per far l'amor!

Son sei sorelle son tutte belle son tutte belle per far l'amor! Son sei sorelle son tutte belle son tutte belle per far l'amor! E c'è la prima ch'è piccolina ch'è piccolina per far l'amor! C'è la seconda ch'è bruna e bionda ch'è bruna e bionda per far l'amor! ma per la terza ci vuol la sferza ci vuol la sferza per far l'amor! E c'è la quarta che fa la sarta che parte in quarta per far l'amor! Son sei sorelle son tutte belle son tutte belle per far l'amor!

Attenzio'!... Belli ffiglio'!... Aiere a Palazzo riale s'è perza na scarpa 'mmiez''e scale! Chi ha perzo sta scarpetta na furtuna l'aspetta si a cchesta bella prova se sottomette! Nun avite appaura!... Cacciate 'o pere annura!... Ogni surdato piglia 'a mesura pe' nu' scassa' 'o cufenaturo!... Stu rre nun è nu cane!... E' bbuono comm''o ppane!... E si facc''o ruffiano è pe' ll'onore napulitano!... E mmò sparate 'o cannone ca 'o rre è nu sciampagnone!... e tanto d''a passione se vo' spusa' a tutt''a nazione!... Attenzio'!... Belli ffiglio'!... Aiere a Palazzo riale s'è perza na scarpa 'mmiez''e scale Vucciahé!... Brebbede bré!... Cacciate 'o pere e datel''o rre!...

(cantato) Da stammatina tammorr'e trombe
tammorr'e trombe
tammorr'e trombe!...
e de cennere n'aria c'abbampa
e de cennere n'aria c'abbampa!...

(recitato) Da stammatina tammorr'e trombe
tromb'e tammorre
comm'a quanno pass''a Sulitaria
d''o viennarì santo!...
Da stammatina na scarpa vacante
purtata 'mprucessione
e 'ncopp''e castielle
ciente cannune
cu 'a vocc'aperta contr''o cielo
aspettanno nu signale
pe' fa' tremma' 'e paura o 'e gioia
tutt''e llastre d''e case!...

(cantato) E aspiette aspiette oi core fino a ttanno
core fino a ttanno!...
Si chesta varca nun è gghiut'a funno
nun è gghiut'a funno!...

(recitato) E' comme si sta jurnata
avesse fatt''o peccato
'e schiara' cu nu pere scavezo
ca tuttuquante nun vereno ll'ora 'e cummiglia'!
Pure 'o mare
stammatina sott''o sole
pareva na jastemma senza voce
e pure 'a voce d''e fecaiuole
nun tene 'o curaggio
d'appanna' chest'aria pesante
comm''a cennere dopp''o ffuoco!...

(cantato) Aiuto aiuto lu munno s'è perduto
munno s'è perduto!...
Li mmonache se vonno mmaretare
vonno mmaretare!...

(recitato) Avite 'ntis''e surdate?...
Sule lloro
rireno e cantano canzone furastiere
ca nuie nun cunuscimmo
e ca se sentono quanno s'è perza na guerra!...
E invece tutto chesto
pe' na scarpa perza
comme si se fosse perz''a rota d''o munno!
E 'o rre fa na legge nova
cumannanno na prova
a onor'e gloria
d''a passiona ca l'ha muzzecato!...
E a gloria d''o rre
stu paese s'è fermato
rint'a na connola busciarda
aspettanno sulo nu terramoto
na lav''e fuoco
na guerra
pe' pute' allucca' e chiagnere
verenn''o miraculo
'e nu santo senza capa
'e nu pere senza scarpa!

(cantato) Ammore ammore mio fatt''o tavuto
mio fatt''o tavuto!...
e 'a rinto te ce miette fravecato
miette fravecato!...

(recitato) Penzate a chella c'ha perzo sta scarpa!
Na corz'all'alba cu 'e guardie appriesso
e 'o core 'nganna p''a paura!

(recitato) Paura 'e che?

(recitato)E chi 'o ssape!
Puo' ssape' maie cher'è ca te fa paura?
Vire stu sole!...
Pare ca te vo' bbene
ma 'e vvote nun pare ca te vulesse 'ncenneri'?
M''a chiamme paura!
E nun è bello pure vestirs''e stu calore
e addeventa' 'o calore stesso ca te spoglia
p'abballa' sott''a na trav''e fuoco?
Sapite che vve dico?
Sta scarpa ca s'è perza stanotte è 'a fortuna nosta!
E' sempe na femmena ca l'ha perza
e si 'o rre ha scatenato l'inferno
vo' dicere ca senz''e essa nun po' sta'
E chi è essa?
Sempe na femmena!
Una 'e nuie ca se pò mettere sott''e piere 'o rre
e addeventa' 'a riggina 'e stu popolo!

(cantato) Oi sole sole jesce a stu paese
jesce a stu paese!...
Addo' chi te vo' bbene more acciso
bbene more acciso!...

- Li brache dellu mio ammore me voglio ve
me voglio ve
vennere
e bulitevélle accattare oi belli fe
oi belli fe
belli femmene

L'auciello dellu mio ammore se ne vo' fu
se ne vo' fu
fuiere
e 'ncappatelo stritto 'mmano oi belli fe
oi belli fe
belli femmene

La vocca dellu mio ammore mò vole ve
mò vole ve
vevere
e facitemmella zucare oi belli fe
oi belli fe
belli femmene -

- Ué Maronna Maronna
e quanta figlie tene sta mamma
Uno me l'ha prummiso
e mmò a mme nun m''o vo' dare... -

- E ce steva nu scarparo
ca teneva 'a suglia 'mmano
'A mugliera c''o scartiello
le scassaie 'o bancariello

Quanno mmiezo me truvaie
'o scarparo jastemmaie
jastemmaie Gesù e sant'Anna
e carette 'a copp' 'o scanno -

- Rint' 'o viculo 'e Filumena
llà nce sta na gatta prena
nun appena ch'è sgravata
tutt' 'e figlie s'ha magnato -

- Sott'a n'albero accuvato
ce sta n'uorco 'nnammurato
si nu pireto ce mena
ogni pianta esce prena -

- Mmiez' 'o campo chin' 'e fave
steva 'o ciuccio 'e gnora vava
nun appena c'arragliava
oro e argiento ce cacava -

- E nu rre s 'annammuraie
'e na vecchia guallarosa
ma tuccannole 'a brioscia
'a menaie 'a copp'abbascio -

- 'A bonanema 'e ron Arturo
s'accustale 'o cufenaturo
s'arrubbaie 'o muccaturo
e nun me l'ha rato cchiù -

- Chillo è 'o muccaturo mio
ca me rette mamma mia
m''o vennette a tiempo antico
ca chiuveva passe e ffiche -

- Pass'e ffiche cu 'a scarola
chell'a gatta è mariola
p'abballa' 'ncopp' 'e riggiole
s'è abbuffat' 'a pummarola -

- E abbuffatela cu 'e ppezze
chesta panza cu ddoi zizze
'ncuorpo miettece na mazza
si sta prova s'hadda fa' -

- 'Nterr' 'a spiaggia 'e Margellina
m'è caruto nu scarpino
Femmene' vieneme 'nzino
si stu pere vuo' alliscia' -

- Ma io tengo chi m'alliscia
'A lavannara nun 'o ccapisce
'O cane arreto 'a porta piscia
quanno piscia e vvo' trasi' -

- E' trasuto a mmiezujuorno
Femmene' me metto scuorno
ma si n'ata vota tuorne
cu te voglio pazzia'-

- Pazzianno pazzianno
s'è aizato fino 'nganna
S'è 'ntustat' 'o sciuttapanno
pe' fa' asci' 'o paperascianno
Quanno jette 'o Ranatieilo
pazziaie 'o panariello
Quanno jette a ssantu Rocco
pazziaie 'o sott'e 'ncoppo
Pazziaie arreto e annante
e ascette na cosa tanta
M'aizaie 'a cammesella
e ascette na cosa bella
Oi ma' si nun ce crire
va a vvere' ca t'arrecrie
Sette arreto e vvinte annanze
se 'mbriacano 'e vvalanze
quanno perdono 'a crianza
pure 'o rre cu 'a panza 'nnanze... -

- E aluzze aluzze
'e cant' 'o mare ce sta nu puzzo
e vva te ce vutte
ca si no muore bell'e dannato!... -

- Maronna!... S'è acciso!... -

Jesce sole
nun te fa cchiù suspira'
siente mai
ca li ffigliole
hanno tanto da pria'

Sole jesce sole

Sole
jesce sole!...

Ma io credo ca pe' sta' bbuono a stu munno
o tutte ll'uommene avarriano 'a essere femmene
o tutt''e ffemmene avarriano 'a essere uommene
o nun ce avarriano 'a essere
né uommene né femmene
pe' ffa' tutta na vita cuieta...
...e haggio ritto bbuono!