Introduzione Jesce sole Madonna de la Grazia Sia maledetta l'acqua Li 'ffigliole Vurria addeventare Cicerenella Si li femmene Vintitré li fronne Vulumbrella Serenata di Pulcinella Tammurriata

Introduzione

voci

Jesce sole
scagliento 'mperatore
scanniello mio d'argiento
che vale quattuciento
cento cinquanta
tutta la notte canta
canta viola lu masto de scola
masto masto
mannancienne priesto
ca scenne masto Tieste
cu lanza cu spada
cu l'auciello accumpagnata
sona sona zampugnella
ca t'accatta la vunnella
la vunnella de scarlato
si nun sona te rompa la capa.

Nun chiovere
nun chiovere
ca aggia ire a movere
a movere lu grano
de masto Giuliano
masto Giuliano
manname na lanza
ca aggia ire in Franza
da Franza a Lombardia
dove sta madama Lucia
nun chiovere
nun chiovere
jesce jesce sole.

Regina de lu cielo
o Divina maestà
chesta grazia ca te cerco
fammella pe' pietà.

Madonna de la grazia
ca 'mbraccio puorte grazia
a te vengo pe' grazia
o Maria fance grazia.

Fance grazia o Maria
comme te fece lu Pateterno
ca te fece mamma de Dio
fance grazia o Maria.

Fammella o Maria
fammella pe' carità
pe' li done ca riceviste
de la Santissima Trinità.

Scese l'angelo de lu cielo
e te venne a salutà
annunzià venne a Maria
e nuie cantammo l'Avemmaria.

Sia maledetta ll'acqua stammatina
che m'ha disfatt'oimè do puverella.
Me s'è rotta la langella
marammé che pozzo fare,
vicini miei sapitela sanare.

Pe' pruvar'acqua doce de piscina
me so' spaccata la cicinnatella.
Me s'è rotta la langella
marammé che pozzo fare,
vicini miei sapitela sanare.

Pignata rotta nun la vò nisciuno
ca po' t'attocca sta pure diuno.
Me s'è rotta la langella
marammé che pozzo fare,
vicini miei sapitela sanare.

La pignatella l'hé 'a sapé guardare
ca po' ch'è rotta nun se po' sanare.
Me s'è rotta la langella
marammé che pozzo fare,
vicini miei sapitela sanare.

Li 'ffigliole che n'hanno ammore
songo nave senza la vela
so' lanterne senza cannela
songo cuorpe senza lo core
li 'ffigliole che n'hanno ammore.

Li 'ffigliole che n'hanno amante
so' comm'arvole senza frutte
so' terreno sicco ed asciutte
che non fanno sciure né chiante
li 'ffigliole che n'hanno amante.

Li 'ffigliole che n'hanno amice
sanno poco che cosa è bene
quanno po' la vecchiezza vene
s'asciarranno triste e 'nfelice
li 'ffigliole che n'hanno amice.

Zetelluccie belle e cianciose
mò gostate che tiempo avite
mò che tennere e fresche site
tiempo 'e cogliere mò le rose
zetelluccie belle e cianciose.

Lo pacchiano che beve e sciacqua
va nforrato de stoppa e llino
ma se aguanno non se fa bbino
se la face 'na panza d'acqua
lo pacchiano che beve e sciacqua.

Vurria addeventare chianellette e po' stare
sotto a 'sti piere,
ma si lu sapisse
pe' straziarme tu currenno jsse.

Vurria addeventare cetrangolo pe' stare
a 'sta fenesta,
ma si lu sapisse
pe' darme morte seccare me farrisse.

Vurria addeventare specchio pe' te mirare
pe' te mirare,
ma si lu sapisse
a quacche vecchia brutta me darrisse.

Vurria addeventare ghiaccio pe' non bruciare
accussì forte,
ma si lu sapisse
cu' st'uocchie ardente tu me squagliarrisse.

Cicerenella teneva 'no gallo
tutta la notte nce jeva a cavallo
essa nce jeva po' senza la sella
chisto è lo gallo de Cicerenella.

Cicerenella tenea 'na gallina
faceva ll'ove de sera e matina
l'avea 'mparata a magnà farenella
chesta è 'a gallina de Cicerenella.

Cicerenella teneva 'na votte
metteva da coppa e asceva da sotto
ma nun teneva tompagno e cannella
chesta è la votte de Cicerenella.

Cicerenella teneva 'no culo
ca pareva 'no cofanaturo
e l'ammustava la notte di stelle
chisto è lo culo de Cicerenella.

Cicerenella teneva 'na vacca
c'aizava la coda e mustava la 'ntacca
ma nun teneva né ossa né pelle
chesta è la vacca de Cicerenella

Cicerenella s'aizava a matina
menava li pisce 'int''o mantesino
uno fujette de sott''a vunnella
chisto è lo pesce de Cicerenella.

Si li femmene purtassero la spada
tristo chill'ommo ca vulesse bene
a donna ca lu cor crudele tene.

Pecché nun sulo lu turmentaria
colli bellizze ma co la spada ancora
mille ferite le darria ognora.

E ne saccio una ch'è tanto crudele
ca si uno la guardasse diciarria
pecché me guardi? E ppo' l'accidarria.

Forse è buono ca nun portano ll'arme
ma chianellette e trezze e verducate
pe' ffa' murire mille 'nnammurate.

Vintiré li ffronne de verdespina
de verdespina
'nce nascette ninno chessa matina
chessa matina e na stella lucente
disse tienelo a mente
a stu munno non guardare
ca li ffronne fa seccare
si l'ammore vuò truvare
spine amare haie da chiantare.

Vintitré li rrose ca io chiantaie
cu lu chianto mio mò addacquaie
ma lu munno mercante
ca d'amore è vacante
tre carline ne vò dare
e li rrose vò cumprare
'ntra li ddete vò sfrunnare
po' li vuole scarpesare

Vintitré streppone fanno lamiento
'nce passaie la notte sott'a lu viento
'na chiantuta de stelle
'na cajola d'aucielle
ca 'stu munno è tristo assaje
te 'ncatena sempre craje
quanno primma te guardaje
e d'amore te parlaje.

Vintitré catene de tiempo amaro
me 'mbarcaje 'nu juorno pe' marenare
pe' piscare 'n'aniello
ca perdette 'n'auciello
chillo auciello sfurtunato
ca 'ngajola era 'ncappato
e a lo mare sconfinato
chill'aniello aveva jettato.

Vintitré li rezze fatte a canciello
cu lu mare attuorno c'è 'nu castiello
'nce passaje sanacore
nenna mia primm'ammore
e me disse: nun lu saie
chill'auciello io truvaje
si lu core me darraje
vintitré oje vintitré vase avarraje.

Fatte molla e no cchiù ddura
mò ca si' formosa e bella
ca ogne fica vulumbrella
a 'sto tiempo s'ammatura.

Fatte doce e no cchiù amara
nun te fa vedere acerba
e non esser tanto brava
fatte umile e no superba.

Mò ca è verde la toja erba
e lu munno renovella
ca ogne fica vulumbrella
a 'sto tiempo s'ammatura.

Mò ca sì 'mmeza ammullata
e tra fionne fai la guerra
nun aspettare ca si' seccata
e che cade in chiana terra.

Fa' ca' ppo' da te se sferra
ca si' tosta fredda e bella
ca ogne fica vulumbrella
a 'sto tiempo s'ammatura.

Ué, ué, nenné s'affaccia
ca sta Pullecenella, Pullecenella, Pullecenella
te caccia la lenguella
e dice i' sto ccà, i' sto ccà, ué ca i' sto ccà
(recitato:) ma pecché nun t'affacce, che t'aggio fatto de male, 'ndretella mia?

Ué, ué co sta resella
co 'st'uocchie e co 'sti vruoccole, co 'sti vruoccole, co 'sti vruoccole
lo core comm''a spruoccole
me staje a strazià, a strazià, ué a strazià
(recitato:) ma pecché nun t'affacce, nun vide ca ce sta Pullecennella ca fa 'a sputazzella?

Gioia de 'st'alma mia jesce ccà ffora
ca mammeta nun c'è, jesce a mmalora.
(recitato:) viento ventatela, munte muntatela, stelle stellatela, acqua addacquatela, fuoco 'nfucatela!

Si craje tu truove 'nfosa 'sta chiazza
so' lacreme d'ammore e no sputazza.
(recitato:) carugnona, carugnona, carugnona, carugnona, carugnona!