Nòno Pio. Lo ricordo così.
Martedì 14 giugno 2000 - da oggi Nòno Pio non c'è più.
 Caro Piero, me despìase far sta pagineta,
ma me toca. No resiste, propio nó resite. Ah ! Piero, te ricordetu quante òlte se avón ciót in giro. Quante olte che
avón parlà de la me paura de afrontar i "córtéi dei dótori". Ti te avèa pì córaio de mì e te à fat tut quel che te
credèa che fuse ben fat, par la tó salute. Ma nó 'l à bastà, Piero.
Me despiàse.
Te avàrìa merità de restar
ancora 'n pochi de àni con noi, ma al Signor e Padre Pio, forse, i avéa ròbe pì urgènti da far.
Me despiase,
Piero, che no i te àbia iutà.
Piero adéss son quà a scriver ste ròbe che nó volàrìa mai scrivér. Te se 'ndat
sènsa disturbar, in santa pase, te se 'ndat 'ndove che i é quei de pì.
Sta tranquìlo Piero, che la to gente la
mandarà avanti quel che ti e la to "paróna" se stadi bòni de meter in pié.
Piero vénere te scórdaron via co
l'ónor del mondo.
Dopomedódì, Piero, sù al to paese, a Igne. Lasù te pasarà i tó dì sensa che nesun te disturbe,
te sarà in bòna compagnìa. Lasù, in medo a le to montagne, 'ndove ke 'l sol d'inverno 'l riva tardi, dove che quando
vien la neve te starà pì calt, quel talian Piero, nò quel tódesco.
Lasù nesuni i te disturbarà e ti nó te
disturbarà pì nesun.
Piero, có sión in te quel pósto, nesun de noi al darà pì fastidio a nesuni.
Te catarà
tuti i to amighi che i è 'ndadi prima de ti. Piero, là, 'ndaron tuti, chi prima e chi dopo. Ma tuti 'ndaron là.
'Ndarà i sióri kome ke 'ndarà i póareti , 'ndarà i bòni come 'ndarà i cativi insoma, 'ndarà i poténti e 'ndarà i debói, 'ndarà i quaquaraquà e 'ndarà chi che à senpre tasést. Come che se avéa parlà tante òlte. Le la fin che farà tuta la jènte del mondo, sensa distinsion de colór de la pèl e del paese dove che i é nasésti. Satu Piero, te sà che són an fifón,
ma sta ròba nó la me fà nesuna paura.
Ciao NònoPio, sta tranquilo.
No voi butar dó gnanca na làgrema, ma
credéme, che se nó la gnarà fòra, vól dir che sarò stat brao a tégnerla éntro. Pio, chisà quando che se vedarón, ma spèteme, rivarò.
nònobepi e 'l tó matèo 16 giugno 2000 Caro Piero, sé èra in tanti. Ma propio tanti Piero. ! Te pól "star cóntent". Mai vist na ròba così, penséte Piero, la césa piena. No se sentéa zolàr na mosca. Tuti stufi, Piero. Don Piero l'avèa més i altoparlanti de fòra: par quei che no ghe stéa de éntro. Te sà, la césa la e picioléta. L'èra na fila de machine che nó finìa pì. Tanta jente Piero, l'èra anca i tó Alpini. Te avéa tre preti: Don Giuliano, tó clàse, Don Piero, me clàse e 'n altro che mi nó 'l cónose. Al còro del tó paese. A la fin, dòpo Don Piero, Gino, coi Alpini su l'aténti, 'l à lèt la "Preghiera dell'Alpino" e dòpo al tó bòcia l'à volést ringrasiar tuti quei che èra a la tó sepoltura. Se ò da dirte la verità, mi nó ò sentì gnént, Piero. Me à ciapà an gróp
quà, che me à vegnést la piandarèla. Savée mi ! Són propio an "pinciagrili", an òn de paia, vùtu far chè, Piero ! Son fàt così. Piero, se 'l éra tuta quela jente, vól dir che te meritéa. Ciao Piero.
nònobèpi |
