Ü bel dé sic o ses fonne i s'è truade töte 'n ca dèla Marietì.

I era rabiùse e 'nviperìde perché i sò òmegn i 'ndàa semper a zügà a boce o a carte, i 'ndàa a spàs o a fa di mangiade, ma lure i a lagàa semper a ca.

Gliura, tòte decorde i a decidì dè fa öna bela festa 'n tra lure.

La Marietì la fàa i gnòc, chel'otra la fàa sö öna bela schissàda, chel'otra la portàa ü bel fiaschet dè ì, chel'otra la portàa la fröta.

Scé, àla dömenga, i avrés facc öna bela mangiada töte 'nsema.

L'e rià la dömenga e come al solet i òmegn i se n' va amò per sò cünt.

Ste fonne vià dè corsa töte 'n ca dèla Marietì per preparà la festa. E 'nfati i prepara la sò bela tàola e i sa met dré a fa cös la sò roba.

I òmegn, però, chi balòs, i a maià la fòia e alura i a pensà dè faga ü schèrs.

Cos'ai facc?

I è 'ndàcc söl camì, i a ciapà öna bela gamba dè legn, i l'a quarciada con d'öna colsa dè sida nigra e po' i l'a lassàda egnì zó adagio, adagio 'n dèl camì.

I fonne töte contete, i s'è sintade zó a tàola, i fa per tirà fo i gnòc, se non chè dal camì al ria zó öna gamba nigra che la dunda 'n sa e 'n là e i sét öna us:

'Fonne fonne dèl cadì, töi sö la löm e 'ndì a dörmì. San Fransèsc al la comanda se ölì crèt ardì sta gamba."

Din-don la fàa sta gamba!

Gliùra i fonne, töte spaentàde, i è leàde sö 'n pé e i è scapàde: öna la curìa dè ché, öna dè lé e po' i è curide a èrs la porta e vià dè corsa ...

I òmegn alura, pian pianino, i è egnì zó, i s'è sintà zó a tàola e i a mangià töcc i gnòc, la turta e 'l vì.

E i a facc pastì e pastù e a noter gnà ü bucù.

Un bel giorno cinque o sei donne si trovarono tutte in casa della Marietì.

Erano arrabbiate e inviperite perché i loro uomini andavano sempre a giocare a bocce o a carte, andavano a spasso e a fare delle mangiate, ma loro le lasciavano a casa. Allora, tutte d'accordo decisero di fare una bella festa tra loro.

La Marietì avrebbe preparato gli gnocchi, un'altra una bella torta, un'altra avrebbe portato un bel fiaschetto di vino, un'altra ancora della frutta. Così la domenica avrebbero fatto una bella mangiata tutte insieme.

Arrivata la domenica, come al solito gli uomini andarono per conto loro. E le donne, via di corsa tutte in casa della Marietì per preparare la festa.

E infatti apparecchiarono la loro bella tavola e si misero a preparare il pranzetto.

Gli uomini, però, quei furbastri, mangiarono la foglia e pensarono di fare uno scherzo alle loro donne.

Che cosa escogitarono? Salirono sul tetto della casa, presero una bella gamba di legno, la coprirono con una calza di seta nera e poi la calarono giù, adagio, adagio, nel camino.

Le donne, contente e ignare di tutto, si misero a tavola, fecero per servire gli gnocchi, e in quell'attimo dal camino arrivò giù una gamba nera, che dondolava di qua e di là e sentirono una voce:

"Donne, donne della marmitta, prendete il lume e andate a dormire. San Francesco lo comanda, se volete credere guardate questa gamba.

Din-don faceva questa gamba.

Le donne tutte spaventate si alzarono in piedi: una correva di qua, una correva di là e poi aprirono la porta e via di corsa.

Gli uomini allora scesero in casa, si misero a tavola e mangiarono tutti gli gnocchi, la torta e il vino.

E fecero una gran baldoria, ma per noi nemmeno un boccone!

homepage