Bollezzumme!
|
"Bollezzumme!" a veu ëse a revista de tutti quelli che parla e lëze
o zeneise. Pe rappresentâla, ò çernùo un di
scìmboli ciù antighi da Liguia, o coscì dïto
Cèrbero de Pontexello. Sta scortùa, stæta attrovâ
do Trentesei, a fäva a guardia à unna çittæ de
tombe di antighi lìguri. O Cèrbero o se ne sta lì,
in sciâ linia de confin de tra o mondo di vivi e o mondo di mòrti;
co''nna testa o dà a mente che noiätri, co-o nòstro
presumî, no sghindemmo into scùo de de là, à
fâghe di sgreuxi à lô, ma con l'ätra testa o sta
in trappa che liätri no végnan de de sà à dâne
breiga. À ciaschidun o sò. E allöa o Cèrbero
o l'è a continuitæ da tradiçion e o nòstro ligammo
co-o passòu de ombre, un passòu ch'o no dev'ëse un imbrumme
opprescivo, ma ch'o ne deve lasciâ ammiâçe d'in gïo;
ma ch'o no l'è manco unna cösa da cacciâla lì
inte'n canto e ascordâsea.
Scriveine, conlaboæ, sostegnîne, pe dâ à divedde à tutti che a nòstra istöia, ch'a l'è ascì l'istöia da nòstra lengua a l'à ancon ben ben do cammin da fâ e che chi veu attaxentâne o gh'avià ancon da giamminâ pe do bello. Scrivei e vòstre opinioin de polìtica, d'economia, de filosofia, de arte, de mùxica, de lettiatùa, in sciâ crònaca da Liguia e de feua da Liguia, pe fâ accapî à tutti che in zeneise se peu scrive de tutto, sensa limitaçioin, à despëto de chi ne vorrieiva appillottoâ, comme ùnica imàgine da Liguia, quella do tiatro dialettale, da poexìa dialettale, di cantanti folk, unn'imàgine fäsa, ma ch'a fa mai tanto còmodo à quelli che comanda. |