Cammino ‘mmiez’â via comme a ‘n automa, ‘a capa sempe aizata a guardà ‘o cielo; nun saccio si sto a Napule, sto a Roma, si ‘nce sta ‘o sole oppure neve e gelo.
Stu desiderio ‘e te cchiù nun se doma E chi mme guarda dice “Ddio d’’o cielo! Ma ‘a capa ‘e stu cristiano è gghiuta in coma Oppure è arravugliata int’a nu velo?”
Insomma stongo sempe ‘nzallanuto, te penzo e ‘mpietto me se allaga ‘o core, ma dinto all’ucchie ‘o sguardo s’è perduto.
Nenna, pigliate â pietto chistu sciore C’aspetta sulo d’essere cugliuto E tene ‘o nomme tuojo… se chiamma ammore.