El pòr pantella
Musicata dal Maestro C. Merli
Per contentà l'ingorda
e veggia usanza,
chi paga la gabella
l'è 'l por pantella.
E quell settaa in cadrega,
golos de grana,
el mangia el bev el dòrma
a la pù bella!
Ti pòr pantella spetta e spera e spera
che la menada on dì la cambia strada.
E intant coi cai sui man ti rèma rèma
sul Pò contra corrent, anmò la barca.
Se in sòrt gh'è nient che cambia
ti sòna la campana
per fà che la giustizia
la se desseda.
I capp de la consulta
de lengua sciòlta,
per dagh d'intend a tutti
ch'el gir el cambia
inventen l'acqua calda.
Ti pòr pantella
cont el coo bass barbòtta...
e poeu trotella!
El v'à on penser sui al d'ona ventada,
per mett in bella mostra el ben de Dio
che i sbaffador cortes in pompa magna,
ghe pias de riff in raff a fa man bassa.
Per lor la carna grassa,
i oss al pòr pantella.
Oej scior Brambilla giuga...
la briscoletta!